الشمس حامية
والعَرَقْ سايل
والكتف شايل
حظُّه بالمقلوب
والهم باقى
والنعيم زايل
والعمر ماشى
والقَدَر مكتوب
لا يمنعه حيلة
ولا حايل
أنا الفواعلي
وصنعتى فاسى
وارث الشقا
وتُكالى ع المولى
سارح فى أرض الغير
عشان ناسى
ما يملكوش قوة ولا حولَ
ولا يعرفوش يحكوا كلام مايل
جيت الحياة
مزروع فى غير طينى
مسقى بمطر الصبر والحاجة
حمول تشيلنى وشيلة ترمينى
والنفس عافّْة بس محتاجة
إمتى يا دنيا تعدلى المايل؟ !
دى الشمس حامية
وده العرق سايل
