نصر فتحى اللوزى يكتب: عسل.. وقشطة.. ودستور

فى الصباح وقبل خروجى لإحضار الجرائد اليومية كعادتى دار حوار بينى وبين السيدة زوجتى كالتالى:
أنـا: أنا خارج عايزة حاجة من بره؟

هى: ماتنساش تجيب معاك حاجة حلوة وانت جاى.
أنـا: حاضر إيه الحاجة الحلوة اللى إنتى عايزاها؟
هى: هات اتنين كيلو عسل أبيض وكيلو قشطة والدستور.
أنـا: إنتى حاطيتى الدستور معاهم؟ والله الجواب الحلو بيبان من عنوانه.

هى: وخليك ناصح ودقرم وانت عند جهاد بتاع الجرانين قوله عايزين دستور من اللى ماضى عليه سى عمرو موسى.

أنـا: هو فيه دساتير تانية فى السوق !!...ماهو كله دستور واحد.

هى: خليك ناصح.. أيوه فيه دستور عاملينه الأبالسة.. حاطين فى بعض نصوص الدستور اللى ماضى عليه سى عمرو كلمة واحدة تطير نافوخ كل واحد مشتاق للاستقرار.. مشتاق للعدالة الاجتماعية.. بيحلم بالكرامة الإنسانية أنــا: يعنى فيه كلمات مدثوثة على الكلام الجد اللى مايختلفش عليه حد؟

هى: الله ينور عليك بس مدسوسة بالسين زى سكينة وزى المنحوس وزى المتعوس اللى ضرب تفليسه.

أنــا: طب وأنا هعرف الدستور بتاع سى عمرو إزاى؟

هى: خليك واعى بص على جلدة الدستور هتلاقى علم مصر فى وضعه الطبيعى مش مثلثات.. وكمان لما تبص على صفحاته هتلاقى إمضة سى عمرو عليه.
أنــا: طب والعسل والقشطة أعرفهم مش مغشوشين إزاى؟

هى: زى ماعرفت الدستور الصح.. مش أنا دايما باقولك اليوم الحلو بيبان من طلوع الشمس.

أنــا: عندك حق ويبقى فى بيتنا عسل صح.. وقشطة صح.. ودستور صح الصح.