فيسبوك
واتساب
شماتة فى موتة
يا ميت ألف عار
عشان مش تبعكم
وكان م اليسار
وتيجى تناقشهم
وإيه اليسار؟
تلاقى الإجابة
غباوة وهزار
يقولّك دا داعِر
وعنده سُعار
وفاسق وفاجر
ومدمن قمار
يا نجم النجوم
كشفت الغيوم
يا صوت الحقيقة يا ضى النهار
كلامه بيسحِر
قصايده بتأسِر
تضوّى ف سمانا تولّع شرار
يواجه ديابة
عشان الغلابة
ويفضل معاهم لآخر مَسَار
فى نومه وسُهاده
يمجّد بلاده
ما حَبّش أجانب وخدهم مزار
لبلده وفاؤه
وكل انتمائه
ما يعرفش كابُل ولا قندهار
فى أزمة.. فى حظ
ما بيقولش "طُظ"
دى بلده حبيبته وليها اعتبار
ما باعش ف ترابها
وحاول خرابها
ما قصش خريطة وفرّط فى دار
مناضل مثقف
وليه ألف موقف
يا جاهل يا مقطف يا حتة حمار
وغاية الطموح
بيسكن سطوح
لا فى أبعدية ولا ميت عقار
بيفطر بفجلة
ويشرب فى قلة
عليه جلابيّة ريحتها الغبار
وحلمه الوحيد
وشوقه الأكيد
يشوف مصر حلوة وجنة وعمار
هنهتف بشعره
ونحلم بحلمه
ونيجى لقبره نقدّم وقار
يموت الشريف
ويفضل نضيف
يعيش المنافق ويفضل فى عار
أحمد فؤاد نجم
