صلاح عبد الله يدين ما يفعله طلاب الأزهر ضد رجال الشرطة

انتقد الفنان صلاح عبد الله، المناوشات المستمرة بين طلاب جامعة الأزهر، وبين رجال الشرطة، منددا بخطورة إلقاء الحجارة على قوات الأمن، والذين قد يكن منهم آباؤنا وإخواننا وأبناؤنا، حيث استنكر بشدة ما حدث، وهجى ذلك عبر حسابه الشخصى على مواقع التواصل الاجتماعى "فيس بوك"، قائلا:

كل يوم الصبح
بروح على الجامعة
شايل كتاب منسوخ
وكشكول مزيت
وقلم إسود
وعرق أبويا
وشقا عمره
اللى ضاع
عليا عشان
أحقق حلمه
وأخش الجامعة
ألاقى الجامعة والعة
وألاقى نفسى
فى المظاهرة
اللى لسه طالعة .. يادوب
ونتخانق مع الشرطة
زى كل يوم
وأحدف واتحدف بالطوب
وأنا بهتف يسقط يسقط
والنهاردة
طوبة منى جت فى راس عسكرى
بس كان راجل عجوز
وفجأة يمكن من تأثير الغاز
وقعت وأنا بهتف يسقط يسقط
واكتشفت إن كتابى لسه مانفتحش
وكشكولى حرف واحد فيه مانكتبش
والقلم انكسر فى جيبى
جنب قلبى .. وصورة حبيبى
صورة أبويا
وأنا لسه بهتف يسقط .. خيالى سرح
مين يسقط عشان مين يعيش ؟!
ومين سقط ومين اللى بعده عاش ؟!
وفجأه رحت لحد بيتنا فى البلد
وشفت أبويا اللى عضم أمه باش
عشان أكمل وأقدر أخش الجامعه
اللى لسه .. ببلاش
وافتكرت إن أبويا
كان فى الشرطة صول
قبل ما يطلع معاش