ياسمين محمد الغريب تكتب: نداء الكرامة

أستنى ليه ولو لحظة بعد ما قلت مش عاوزك تكونى معايا.. حبيتك أيوه وعشانك فضلت أبص دايما ورايا.. لحد ما وقعت فى الفخ ولقيتك بتكلمنى عن النهاية.. هرد أقولك إيه كان قلبى بينزف لكن كرامتى منعتنى وقلت خير عشان كدا إن كنت جاى تسألنى ليه إتغيرت.. أيوة أنا إتغيرت زى ما أنت بعدت وهان عليك العشرة..
هقولك كلمة قالها قلبك القاسى فى يوم اتكرر كتير، قالى انسينى وانسى الماضى أيوه أنا لسه فاكره.

كنت فاكر قلبى حجر هتجرحه ويقولك كمان أنا مش بشر كرامتى جرحتنى وقالتلك كفاية ده وقت المطر، أيوه هى دى لعبة القدر.. يوم ما سبتنى ونويت السفر نسيت القلب اللى حبك وعشانك ياما إتعذب واستحمل منك كتير.. بقى بعد كل ده ماستحقش منك التقدير.. معقول فضلت على قلبى قلب تانى صدقنى مش بغير بس مستغربة ده اللى بينا مش يومين ولا نسيت عشرة السنين!

وقبل ما تنزل ستارة النهاية أحب أقولك إنى ما كنتش ضعيفة، أنا كنت دايما برجعلك لأن حبى ليك اللى أنت ضيعته بايديك فاق كل الحدود، بكرا تلف بيك الأيام وتوريك مين كان بيحبك وكان عايش ليك ومين بعد وقال كفاية.. هلومك ليه ما خلاص أنت نسيت يلا سلام وشكرا على النهاية.