من فوائد عدم الفهم

قالت البنت لأخيها: أنا مش فاهمة حاجة
قال أخوها: أحسن!
قالت: أحسن فى عينك، بقولك لك مش فاهمه
قال: عادى
قالت: إتلم أحسن لك، يعنى أنت اللى فاهم!
قال: طبعا
قالت: طب فهمنى
قال: أفهمك إيه؟
قالت: اللى أنا مش فاهماه
قال: أفهمك إيه ولاّ إيه، هوّا انتى من إمتى بتفهمى؟
قالت: بطل غلاسة بقى، أنا باتكلم جد
قال: عايزة تفهمى إيه بالضبط؟
قالت: همّا بيحاكموا الدكتور مرسى ده على إيه؟
قال: على إنه أمر بقتل اللى بيهاجموه فى قصر الاتحادية
قالت: مش هوا برضه مفروض يدافع عن نفسه، مش كان ريّس.
قال: يدافع آه، إنما يقتل لأ
قالت: ما يمكن إن ماقتلشى يتقتل
قال: يتقتل إزاى وهو ريس؟!
قالت: هو الرويَسَا متحصنين ضد القتل
قال: برضه الأمر ما يسلمشى، إمال الحرس والبلاوى الزرقا، دول لإيه؟
قالت: ما هو إذا كان قال، يبقى قال للحرس اللى مهمته إنه يحميه، هوّا يعنى قال لمين اضربوا
قال: أنت جرى لك إيه؟ أنت رحتى الناحية التانية ولا إيه؟
قالت: ناحية تانية إيه؟ وأولانية إيه؟ أنا عايزه أفهم.
قال: ما تفهمى حد حايشِك
قالت: ما أنت مش عايز تفهّمنى
قال: يعنى أنا اللى فاهم
قالت: طيب مين اللى يفهمنا؟
قال: القاضى
قالت: آه صحيح كنت ناسيه إن فيه قاضى
قال: بصراحة عندك حق أنا عمّال أدشّ أنا كمان، وناسى إن فيه محكمة وقاضى.
قالت: مادام فيه "قاضى" و"محكمة" و"ربنا" إمال كل الهيصة دى عشان إيه.
قال: دى مش هيصه دا حشد جيوش
قالت: أديك قلت أهه، يبقى القضا والنيابة والمحاكم لزومهم إيه
قال: آه صحيح!!
قالت: آه صحيح إيه؟
قال: آه صحيح زى ما أنت قلتى
قالت: أنا قلت إيه؟ إن كان علىّ: أنا أحاكمه عشان حاجات تانية أهم
قال: هوّا فيه حاجة أهم من قتل البنى آدمين
قالت: ما انت شفت أهه إن دى مسألة فيها كلام
قال: يعنى...!! طب حاجات تانية زى إيه؟
قالت: التهم على قفا من يشيل: من أول البتاع الدستورى اللى طلّعه ده، لحد اللعب مع أمريكا وإسرائيل، لحد خراب مصر
قال: طب ودى تثبتيها إزاى بقى؟
قالت: أنا مالى! البركة فى المحكمة، عموما حاتبقى أسهل من إنى أثبت إن الدفاع عن النفس، وهو رئيس، قتل مع سبق الإصرار
قال: ما أنت طلعتى فاهمه أهه أكثر من أبونا وأمنا
قالت: كله فى المحكمة، يا كده يا مفيش دولة ولا يحزنون
قال: آه صحيح، ما تقولى الكلام ده لأهالينا
قالت: ياعم دول اشتروا دماغهم من زمان
قال: إزاى؟
قالت: مابيحاولوش يفهموا من أصله
قال: الله ينور، أهو كده عين العقل