همّ فْى إيه ولا فْى إيه؟ !

قالت البنت لأخيها: لا، لا، لا، .. أنا مش قادرة أستحمل؟

قال أخوها: بصراحة عندِك حق، هوّ مين اللى قادر؟
قالت: عمالين ندشّ كلام وخلاص، أنا محتاسة
قال: محتاسة فْى إيه ولا فْى إيه؟

قالت: أنا ما عنتش عارفة مين عمل إيه فى إيه؟ مش فاهمة أيها حاجة.

قال: ما هى كل حاجة باينة زى الشمس أهـُه
قالت: هوّ إيه اللى باينة زى الشمس، باينة لمين، ولحد امتى؟ هو الوقت ببلاش؟
قال: إنتِ مستعجلة كده ليه، دول تلات سنين عـُمْى؟

قالت: جك عمى اسود، هما تلات سنين شوية، دى الحملة الفرنسية كلها مدتها كانت تلات سنين، وعملت اللى ما يعمل، كفاية كتاب "وصف مصر".

قال: والله ما انا عارف هو كان وصف مصر ولا فتح مصر؟
قالت: الظاهر الحملة الجديدة دى حاتعمل كتاب يسموه: "قفل مصر".

قال: الله يغمّك يا شيخة، بشروا ولا تنفروا.

قالت: بشروا إيه وزفت إيه، ما هو لازم حاجة تتعمل بحق وحقيق ودلوقتى حالا.

قال: أهم طلّعولك قانون المظاهرات يا ستى، مش كفاية كده؟
قالت: بصراحة "كفاية"، و"مش كفاية".

قال: إنتى حاتعملى زى الحكومة، إيه الرقص على السلم ده.

قالت: عموما، أهم أحسن من اللى عايزين يخربوها ويقعدوا على تلها.

قال: هما مين دول؟ لا لا لا لا، مش قوى كده، هم مش زى بعضهم.
قالت: أهم ناس حايخربوها بالعمَى، وناس حايخربوها بالخيانة، وناس حايبيعوها بشوية دولارات.

قال: واحدة واحدة اعملى معروف، ما هى لما حا تخرب حاتخرب عليهم كلهم.

قالت: بس الإخوان باين عليهم عارفين لهم سكة خصوصى.
قال: سكة خصوصى غير السويتّات اللى فى الجنـّة.

قالت: أستغفر الله العظيم، إنت بتقول إيه؟

قال: أستغفر الله العظيم، أصلهم باين عليهم مش كافيهم التكويش على المشاريع والفلوس والمناصب فى الدنيا، دول مركزين على الدنيا والآخرة فى بيعة على بعضها.

قالت: وحانعمل إيه؟
قال: العمايل عمايل ربنا.
قالت: وربنا حا يعمل إيه؟
قال: كل خير.
قالت: وإسرائيل؟
قال: تانى؟ مالها؟
قالت: بتتحزم وترقص كل ما تشوف اللى احنا فيه، واللى احنا رايحين له.

قال: يحـُقّ لها.
قالت: يحـُقّ لها يعنى إيه؟

قال: هى فى ديك النهار اللى يتحطم جيشنا ويتفركش شعبنا منّه فيه.

قالت: طب ليه ما حدش من دول ولا من دول واخد باله.

قال: همّا فْى إيه ولا فْى إيه.
قالت: آه صحيح، همّا فْى إيه ولا فْ إيه.
قال: يا عينى عليكى يا مصر.

قالت: لأ، لأه، مش للدرجة دى، إنت فاهم إيه!!!؟

قال: بقيت زيـِّك، مش فاهم أيها حاجة.