صابر القصاص يكتب:دورة حياة الكائن المصرى "الولادة"

الكائن المصرى ده كائن فريد من نوعه فصيلة نادرة يعنى بتعيش وتترعع فى منطقة شمال شرق أفريقيا، ولكن غالبا ما تجدها بكثرة فى دول الخليج..

الكائن مصرى بتبتدى حكايته مش من اليوم اللى بيتولد فيه، لا باليوم اللى قبل اليوم اللى بيتولد فيه، اللى بيكون الأب مقرر فيه ابنه ده هيتولد فين..

كان زمان قدام الأب ده اختيارين يا إما يولده فى البيت يا إما يولده فى المستشفى والأب هنا كان بيبتدى يعمل عملية "كوست استميشن" اللى غالبا كان بتبقى حسبة فاشلة..

كان الأب يا سيدى بيفكر إزاى بقى.. كان يقول: مع وضع صباع السبابة على الجهة اليمنى من رأسه قال يعنى مفتح، أنا أولده فى البيت على إيد الداية أم أحمد اللى ولدت نص سكان الحتة وأوفر بكدة ثمن المستشفى وأعمل سبوع محترم للواد أصل كان تفكيره على قده لأن كانت التوعية الصحية أيامها كانت فى الحضيض، لأن فى الغالب بعد العك بتاع الداية دى كان العيل بيفلسع بدرى بدرى "فلت ابن المحظوظة" وبكدة بيكون هو وفر تمن السبوع اللى بعد كدة كان بيجيب بيه فاكهة للأولاد..

أما بقى كان فى بعض الناس البهوات الذين كانوا يسكنون القصور الفارهة ويتحدثون بلباقة فكانوا يقولوا إيه بقى.. لا إحنا نودى بنتنا "جولفدان هانم" المستشفى عشان تولد على يد عمها الدكتور عزيز بيه السلحدار وتولد والولد كانوا بيسموه شوكت على اسم جده بصرف النظر على أن الواد اللى ولدتو الداية سموه جعيدى على اسم الحمار بتاعهم اللى مات..

دلوقتى بقى الأوبشنز قدامه الأب اختلفت عن زمانه، هم صحيح لسة اتنين بردوه بس اختلفوا دلوقتى جو الدايات اللى ولدت نص الحتة دى خلاص بطل والسبب فى كدة إن النص التانى من الحتة اللى ولدتهم الداية كانوا بيتكلوا على الله بدرى بدرى بسبب الإهمال بقى بسبب ضعف الإمكانيات..

المهم إنها كل سنة وأنت طيب الأب دلوقتى ماعدش قدامه إلا طريقين يا مستشفى حكومى معفنة يا مستشفى استثمارى مكلفة، هنا بقى البهبهات بيتقسموا اتنين فى بهبوهات بيقولك "لا ده الواد الحيلة ده أنا أولده فى أحلى حتة وتكلف زى ما تكلف" صحيح أنه بيندم بعد كدة على فتحة الصدر دى بس أهو برده عمل شغل على نضيف ويقوم يوديه مستشفى الدكتور...............

نيجى بقى للمواطن الغلبان اللى بيعمل بردوه "كوست استميشن" سريعة ويوصل لحل عبقرى ويروح قايل "لا أنا أودى الولية مراتى تولد فى أبو الريش الجامعى ده بيقولوا إنهم جددوها وخلوها زى الاستثمارى بالظبط، ووزير الصحة الجديد ده راجل نشيط، ساعتها بس تبقى كل مشكلتك أنك تدور على حتة فاضية تشتم فيها براحتك......