مايسة مسعود تكتب: رئيسى المحتمل

بلدى لاتحتمل.. بلدى شافت مرارًا وتعبت من الانتظار.. كرامتنا متهانة واللقمة بإعانة وطول الوقت حكومتنا سرحانة.

رئيسى المحتمل الوضع لا يحتمل بنزرع بإدينا الوباء ونلم تبرعات أصل حقوقنا منهوبة وحايتنا مسـلـوبةه.

رئيسى المحتمل مش هقولك على اللى فات عاوزين نشوف إنجازات تكون معانا مش علينا، وتحمى أرضنا وترحم شعبنا وتبقى فى ظهرنا بره وجوه.

عاوزين كرامتنا متصانة وبدل ما تبنى سجون وتعليها أبنى مساكن وارحم ناس من برد الشارع وأطفالنا مالية الشوارع بلاش إصلاحيات، مهمة حكومتنا تأهلهم وتعلمهم حقهم أن الدولة تتكفل بيهم مش فى الشارع ترميهم متقلش عددنا 100 مليون دى ثروة يا باشا، إيديك بإيديهم ازرع واحصد وابنى وعلى واحرص أرضك عاوزين مساواه.

رئيسى المحتمل بلدى مبقتش تحتمل عاوزينك تخلصلها مش تخلص من شعبها فى عبارة مرة أو قطر سكة نفسنا نشوف نظام شبعنا من الكلام مش عاوزينك مرة تشاور وتقول أطراف خارجية هو أحنا ملحقين على الداخلية عاوزين عدالة اجتماعية، وكفاية أزمات مفتعلة يعنى متصدرش الغاز، واحنا مش لاقيينه وبلاش نستغبانا إحنا خلاص بقينا فاهمين!