محمد أحمد دويدار يكتب: آه يا بلد

آه يا بلـــد متشقلــب حالهــــــــا
فقرية وحظها منحــــــــــــوس
آه يا بلــــد مكسبـها خسايــــــر
واهو كل ما فيها معكــــــــوس
إن جانــا ربيع ييجي فـ ينـــــاير
وإن جانا الواد ييجى موكـــوس
آه يا بلـــد دايــرة فــ دوايـيــــــر
وفـ قلب الدايرة شعب ومحبوس
راح أقولهــــاك بأه مـــ اللآخـــر
راح اقولهــــا كدة بالمحـسوس
لا أنا شاعر ولا كاتب ساخـــــر
أنـا واحـــد منــــك مفــــــروس
أنـا حلـمــك أنا ابـــن مهاجــــــر
كان راجع علشـــانك مخصوص
وفـــ ريـــحك يتـــزنــق يتـأخــر
وفــ ليـلـــك راح يبــقى فانــوس
وأنا لسه بعافـر الحلم أهو سافر
لا أنا منك فاهم ولا ليكى قاموس
اتغير شكلــك ولا أنا مش فاكـــر
اتغير طبعــك ولا ده مــــــوروث
مش ناوى يا بلدى بحلمى أتاجر
مش ناوى أبيعـهُ بـ تــل فلــوس
أنا ماشى الوقتى وراجع باكــــر
يمكن بكره يكون له شمـــــوس
يمكن يـــيــجى مســـــامح قــادر
يجمع شمـــل قلـــوب ونفـــوس
آه يا بلــــد مكسبـها خسايـــــــر
واهو كل ما فيها معكــــــــــوس