ميرفت عاصم تكتب: إنسان

كنت فــ يوم نايم تعبان
نفسى قالتلى وعقلى كمان
ليه زعلان كده يا إنسان
قلت: أفضفض حبّه
وأدوب فى الأحزان
صعب الحال عــ العين فى الحال
ونزلت دمعة معاها سؤال
ليه زعلان!؟
قولت: كتير شارد تعبان
عقلى الطيب.. شافنى ونادى
قالى تعالا أنا عندى عيادة
والعلاج فيها بالمجان
فيها هتقدر تحضن روحك
وتشفى جروحك مــ الأحزان
والدكتور كان هوه ضميرى
خدنى بفرحة وبالأحضان
قالى الدنيا جميلة تعالى
وافتح لجمالها الأحضان
أيوه كفاية عليك إن أنت
تبقى فــ وسط الناس إنسان
والنسيان جه قالى كمان
أنا ليك نعمة استعملها
ليه بتسيبها وليه تهملها
وليه حيران.؟
وست مبادئ هانم قالت
أنا حبيتك وأنت كمان
امسكى فيا
وموتى عليا
مش هيجيلك لحظة شيطان
بيا هتبقى زى ملاكى
ولا فيش غلطة هتستناكى
ولا توهان
قوى عزيمتك.. تعلى فــ قيمتك
مش هيصيبك غدر جبان
عيشى عفيفه بريئة وقورة
كونى بصبرك أقوى صبورة
ليكى البشرى من القرآن
رجع العقل الطيب قال
إيه رأيكوا: قولوا يا إخوان
رد الكل عليه وقالولوا
ليك الطاعة والعرفان
فرح العقل وطار مـــ الفرحة
وقال ده علاجى وبالمجان
ولقيت نفسى بحس براحة
قوى مرتاحة
وراح الهم مع الأحزان
أقدر أنام دلوقتى بجد
إحساس حلو إنك إنسان