حجاج فراج يكتب: هجرة شرعية

مركب فيها اتحشرنا إحنا بالميات...
وعيون وقت الرحيل كلها دمعات..
على فراق الوطن وف القلوب أنات
والصحبة كانت أمل وحبة ذكريات..
علام نصيبنا منه كان شهادات.....
مزينه الحيطان تمام كما اللوحات
حزينه لكن حزنها فى سكات......
برغم أن تمنها كان عذاب وأهات
كل يوم فى الجرايد تلقى مانشيتات
مليون وظيفه واقفه ع الطلبات.....
تروح تقدم تلقى ورق ملزوق.....
يفيد بأن الميعاد مر وقته وفات....
وشقق خاليه كتير تلقاها ف العمارات
تسأل تمنها كام تلقى التمن ألافات....
لو جه فى خيالى أسكنها...............
ما يكفى نص تمنها من السنين ميات
و بنت الحلال باشوفها بس ف المنامات
وأزاى قلبى يطولها ومهرها ألوفات...
وجهازها أربع أوض وشىء وشويات..
يعنى لا بد أكون حتمًا من البهوات.....
عشان كده قررت أصعب القرارات...
أروح بعيد لبلاد ما فيها تعقيدات......
حتى إن بلعنى الموج برضه أنا راضى
تسوى إيه الحياة وأنت عديم الذات....