فيسبوك
واتساب
كنت أتمنى أنه ينكر
و لو أنى بعينى شُفته
ما حاولش حتى يكدب
إزاى هقدر أسامحه؟
شكّيت فيه من زمان
كان في علامات كتيرة
لَجل الحب اللى كان
بسكت وأنا كُلّى غيرة .
على نفسى ضحكت ياما
قلت بلاش الظنون
دا بقلبه وعقله ليكى
عمره ما يقدر يخون .
وف لحظة كنت عارفة
إن حاجة أكيد بتحصل
بس عينى ما كاتش شايفة
قلت حياتنا تكمِّل.
قلت يا بت إنتى أهدى
عايز يثبت رجولته
نزوة و أوام تعدى
لكن إنتى اللى حبيبته.
صدفة وشفته معاها
عينه سارحة ف عينيها
روحه دايبة ف هواها
إيده بتحضن إيديها .
بعد بعينى ما شفته
كان لازم اواجهه هوّا
وصدمنى لما سألته
ببساطة ... قاللى : أيوه .
إزاى هقدر أسامح ؟
زعلى آخر ما فكّر
ما رعاش شعورى خالص
لو حتى بإنه ينكر.
صورة أرشيفية
