"كلّنا ف سنة أولى/ مصر" قصيدة لسعيد حامد شحاتة

السبت، 05 أكتوبر 2013 10:14 م

الشاعر سعيد حامد شحاتة

كلّنا حبّة تلامذه
حرف وضفيرتين وهمزه
وضحكه بين بطرس وحمزه
وقلب متزوّق بمصر
****
الهتاف الصبح واحد
والهتاف في الفسحه واحد
والكتاب ع التخته واحد
والنشيد الحلو مصر
****
شكل لون البشره غالب
والبدن قالب وقالب
دمّنا موجب في سالب
والفصيلة بتاعته مصر
*****
القلوب مدفع ودانه
والوشوش ضد الإهانه
والعيون صدق وأمانه
والضلوع عمدان لمصر
*****
كلّنا من فصل واحد
كلّنا من ضلع واحد
كلّنا ع الأرض واحد
كلّنا ف سنة أولى/ مصر