سلوى على محمد تكتب: لعبة قدر

عارفة إنى مهما أهجر
مهما أبعد
برده أنت تبقى فاضل حب عمرى
حب عايش جوه قلبى
حب لما الدنيا تقفل كل باب
ييجى هو وينادينى
حب قاعد جوه قلبى
حب راسم درب عمرى
حب مغزول من أنينى
بس دى همسة قدر
قدرنا إن يفرقنا القدر
رغم إن حبنا
صلب صلابة الحجر
مش هو اللى غير القمر
خلاه ينور نوره أكتر
علمه معنى الغرام
علمه إن الكلام
ممكن يكون من غير كلام
علمه كل ليله ييجى ويرمى السلام
كل ليله كان سهران معايا
حاسس بحزنى وبضنايا
أسفة عُمرى بعتذر أقوى اعتذار
إن فرقنا القدر إن غيرنا المسار
لكن دى لعبة القدر
تِظهر قمر
تِخفى قمر
لكن فى النهاية
كلمة واحدة
عايزه أقولها
هى دى لعبة قدر