فيسبوك
واتساب
صوت البارود فى ودن الجَحود زغاريط
داس ع الزناد الخسيس خلى الولاد فتافيت
طيور فى عمر الزهور الفرحة فى قلوبهم
خلتهم يرقصوا ويلعبوا ويتنططوا تنطيط
-------------
مجرم خطير حقير مأجور ما عنده دين
قاتل سافل جاهل غافل عن رب العالمين
ناقص كرامة ياما والرجولة عنده فين؟
يا فرحة ما تمت ولا خلت غير التوابيت
---------------
حرقوا الكنايس واللى فضلت منهم
حضنت ولادها الغرقانين فى دمهم
يا ليل طويل الويل على عيون أمهم
بكرة النهار يطلع لهم ينور كل بيت
--------------
النصر جاى لازم يا مصر وربنا
بس المهم نخلى بالنا على بعضنا
بكرة العويل يندم ويقول يا ليتنا
لما المشانق تتسابق وتنحكى الحواديت
--------------
بكرة يكتب التاريخ ويسطر سطور سودة
عن اللى قتل مريم وعفت وجيكا وعودة
عن اللى بيخلوك يا مصر تنامى مهدودة
عن الكذابين المعجونين بمية العفاريت
صورة أرشيفية
