م. محمد عاطف عبد المنعم يكتب: الخلاف والاختلاف

الخلاف والاختلاف
معنى واحد للكلمتين؟
ولا دى كلمه من معنيين؟
علماؤنا فيهم مختلفين
ودى بداية الخلاف
ليه دايمًا فيه عداء
بين أصحاب الآراء
أصبح مرض وداء
كلنا منه بنخاف
فارض رأيك بالقوة
عامل بلطجى وفتوة
رأيك مفيش إلا هو
وإلا حرق وإتلاف
اختلاف الأمه رحمًا
واختلافك ليه أعمى
قلبك أسود فحمًا
عقلك فيه انحراف
ليه فارض سوء الظن
التعصب عندك فن
بلاش ضجيج وزن
خليك نقى وشفاف
مختلف فكريًا
مختلف دينيًا
مختلف سياسيًا
احترم كل الأطراف
نسمع بعض ونتحاور
وبلاش منك عصبية
وبكل هدوء نتشاور
أفكارك يمكن غبية
عامل نفسك فالح
رافض كل اللى اتقال
رأيك هو الصالح
وأنت بايعة بالمال
وبتجرى ورا المصالح
أجدادنا قالوها أمثال
اختلفت الأرزاق
محدش عجبه رزقة
اختلفت الآراء
الكل عجبه عقله
هنقول إيه لأجيال
لما تسألنا سؤال
إزاى الدم سال
لمجرد اختلاف
لمجرد الخلاف