روبير الفارس يكتب: يا مريم..مين هيغسل دمك من على شجرى

(إهداء إلى شهيدة الوراق الطفلة مريم )

الكلام فى قلبى علقم
يا مريم
يا ندى وابتسامة وعلامة
كان القمر بيقف على رجليه
مشدود
مستنى ضحكتك
وشقاوة العود
ولمسة إيديك البلسم
يا مريم
والشمس كانت بتحسدك
يا غالية على رقتك
مين ياخدنى لسكتك
وارتاح من كرابيج الدمع
اللى بتلسع روحى
وبتخلع ننى الشمع
وتولع لهيب فراقك
من على حجرى
يا حزنى
على النور اللى عتم
يا مريم
عملتى ليهم إيه
وأنتى معندكيش غير شهادتين
شهادة ميلادك
وشهادة معموديتك
ديه اللى خوفهم من قوتك
يا بنتى يا ضنايا
مش عايزة تاخدى لعبتك
اللى رعبت جبابرة
شاب شنابهم
قطع دراعهم
اللى قطعت ذرعتك
وسممت النسيم
يا مريم
مين هيدغدغ قلبى
مين هيفرد عمرى
مين هيدعى لربى
مين هيغسل دمك من على شجرى
وهى مغرقانى من جذرى لثمرى
دمك يا بنتى غسلنى
عايز ابوسك فى كفنك
وانت فى حضن الملايكة
وأجنحة الشاروبيم ..بتمنعنى