سيد أحمد الهمشرى يكتب:كنيسة العذراء .. !!

أودى وشى من إخوانا النصارى فيـــــــــن ؟
واشكى لمين بلوتى وأوصف أسايا لميـــــن ؟
عملولنا إيه النصارى عشان نروعهـــــــــم ؟
وامتى يا مسلمين القتل كان فى الديـــــــــن ؟
...
مش مسلمين اللى رفعوا فى وشنا سلاحهــــم
ولا مسلمين اللى صابوا الناس فى أرواحهــم
ولا مسلمين اللى حرقوا كنائس الأقبـــــــــاط
وجاروا على أرضهم وسرقوا أموالهــــــــــم
...
مش مسلم اللى بغبائه خان حقوق الجـــــــار
ولا مسلم اللى يقول إن القبط كفـــــــــــــــار
ولا مسلم اللى يمشى فى سكة الإرهـــــــاب
ولا مسلم اللى يولع فى الكنايس نــــــــــــار
...
الدين محبة ما بين المسلمين والنـــــاس
فيه الوداد والسماحة لكافة الأجنـــــــاس
عايزين نطهر قلوب المسلمين تانـــــى
ونطرد الغطرسة والحقد والوســــواس
...
يا (كنيسة العذراء) جميع المسلمين أسفيـن
لا الشر من طبعنا ولا من أصول الديــــن
ووعد مع بعضنا نقضى على الإرهـــــاب
وصدقينى اللى جرحوا فرحتك خاينيــــــن
...