محمود الزهوى يكتب.. ألوان

باعيش فى قصة فى خيالى وبارسمها وألوّنها
وأحفظ كل أشخاصها وأوقاتها وأماكنها
باعيش فيها وأكون منها
وتغدر بيا وتسيبنى!!
ألاقى صاحبى كله خداع..
وألاقى الحب يبقى وداع..
ويروح طيف الهوى منى
وييجى بداله مليون طيف
وكله يروح بنسمة صيف..
وييجى الصيف
وأبدأ رحلة من الأوّل
وجرحى فيها بيطوّل
وعمرى بيبقى بحر هموم
سعادتى عمرها ماتدوم
وأقول موتى خلاص قرّب !!
وكله فى لحظة يتسرّب..
وييجى ربيع بلون أخضر
وتسكن فرحته قلبى وتتمختر
وحزنى كله يتبخر
وأعيش فرحان..
وكل الدنيا تضحكلى
وياخدو الفرحة من شكلى
ولحظة حزن تفاجئنى
أتوه جوايا فى مشاكلى
وأتغيّر..
أنا إنسان
حياتى كلها ألوان
ما بين الأسود الغامق وبين الأبيض الفتان
أنا تايه فى بحر الكون
وعايش كل لحظة بلون
أنا عايش أنا ميت
أنا عاقل انا مجنون
حياتى كلها لوحة ومرسومة بإيد فنان
وكل مواقفى جواها بقت ألوان.. أنا ألوان.