فيسبوك
واتساب
حاسة إنك حِتة منى من زمان
حاسة إنى شامة ريحتك ف المكان
نظرة منك وابتسامة تساوى كـُون
حاجة بتحسسنى دايمًا بالأمــان
الحنان وياك بيبقىَ مُوجُه عالي
وألقى نبضك جوه منـّى عاش ليالي
وانسىَ روحى وانسىَ نفسى لو معاك
وافتكر سحر الكلام وياك ف بالي
حالى من بُعدك بيبقىَ حالة نادرة
مشتاقلك طول حياتى عايشة صابرة
وابقى مش عارفة حقيقة حُبى لكن
فيه ساعات بضعف وبعمل نـَفسى قادرة
حاضرة دايماً ليه دموعى وتحاسبني
حتى حيرة قلبى مش عايزة تسبني
لما افكر إنى أبعد أو أسيبك
يومها ما لقاش ضحكة حلوة بتناسبني
وتقاسمنى فيك تملى واحدة غِيري
وانت بتعاتب وتسأل ليه تِغِيري
واكتم الآه وأدارى جرح فيّا
ليه تِقيد النار ف قلبى وف ضميري
يا عبيرى يا هَنا القلب وحياتـُه
صَحّى أشواق جوه قلبى كتيره ماتوا
عوض الماضى وكون لى أحلى بُكره
ننسى ليل الفـُرّقة ننسى ذكرياتـُه
صورة أرشيفية
