كثر الحديث عن "الحرية" بشكل يجعل أى عاقل يحترم هذه القيمة، يتساءل: هل يعرف هؤلاء الناس الذين يهتفون لها أو يقدسونها، أو يتصورون أنهم يتمتعون بها، المعنى الحقيقى للحرية؟ تتكرر معانى شائعة كثيرة تحفظت عليها مرارًا مثل أن حريتى تنتهى عند بداية حرية الآخرين، وقد نبهت إلى ما أسميته وأدعو له من أن حريتى تبدأ حين تتصارع مع حرية الآخرين، تحت مظلة عدل مطلق وقيم متكافئة....إلخ.
المعروض فى السوق محليًا وعلى مستوى العالم أنواع متعددة من الحرية ليس بين أى منها القدر الكافى من الحرية الحقيقية، فثم حرية أمريكانى، وحرية صينى، وحرية مجلس أمنى، وحرية الناتو، وحرية إسرائيلى، وحرية تايوانى، وحرية خليجى، أنا آسف والله.
أما الحريات المحلية فخذ عندك: حرية بطعم ماسبيرو، وحرية بطعم 25 يناير، وحرية رابعة الماسونية، وحرية صناعة تحت السلم، وحرية الشرعية الصناديقية.
أثناء كتابتى لأغانى الأطفال (التى اكتشفت أنهم خارجنا وداخلنا) وصلنى على لسانهم رجزًا راقصًا وجدته أبلغ من كل ما يشاع عن الحرية، بما فى ذلك شعار الثورة: عيش "حرية" عدالة اجتماعية.
-1-
بيقولوا كلام مالهوش لازمة
باين أهالينا ما هيش فاهمة
قال "حرية" !؟.... اُسـْـكُت لاغْلط.
بتهرّج واللا بتِسْتَعْبَطْ !
هوا أنت يا عمّنا أصلاً حرّ
دى الحنفيّة عمّالة بتـخُـرْ
أفكار جاهزة، فتوى وأحكام،
واللى ينهّــق ركّبــْ له لْـجام !!
-2-
"تتحرك جوّه اللى قلناه وإنْ كان عاجبكْ،
وساعتها تبقى حر تمام، كدا على قدّك"
دى حكاية وباين مش نافعة
دانا زى باخطـَى فْ نار والعة
-3-
الحرية ما تجيش أبدًا كدا ما الآخر،
ولا كلّ ما أقرّب تـتَّأخر
بصراحة أنا خايف أبقى حر.
أصل انا ما اعْرَفشى "أسيبها تمُرّ"
حا تمرَى ازاى وتروحى على فين،. .. وأنا مش دارى
أصل أنا باستعبط، وبَدَارِى
مش عايز أكتفى بشعارها
ولا عُدت ارتوى من أشعارها
ما تقوللى الأول قصدك إيه
وتسيبنى اعمل
راح تستغرب ما اللى عملته وقدرت عليه!!
-4-
الحرية هى "الحركة" جوّاكْ برّاكْ،
هى أنك تقدر تتغير من "هنا" "لهناك"،
و"هناك" مفتوح وبيتفجــّـرْ
كل ما توصلـّه يتغيّرْ
اوعى تصدقهم: تستنى "لحد ما تكبر"
دا أنت تراجع أوِّل باول: كل كلامهم
راح تلقى حاجات مش على بالهم، غصبنْ عنهم
وتفكر "بالعقل" وبرضه بحاجات "هيّه"،
ما أنت عارفها، مش مستنى منى وصية
-5-
الحرية أنك تتحرك وتراجعْ
"إنك تحترم اللى وصلـّك!"، دا مافيش مانعْ
.... بس يا خويا يبقى بداية،
بسْ مش أكتر
وتغامر تحمِلْهَا أمانة، مش تتمنظر
-6-
الحريهْ: إنك تقدر ترمى طوبتها
لو مش قادر، تدفع "حالا": حق قيمتها
بس تأخد بالك، مش يمكن: تستحلاها؟
مهما كات غالية، اوعى تقول "ياللاّ...، بلاها"!
-7-
الحرية: عمرها ما تكون وأنت لوحدك
الحر صحيح لازم يبقى كده وسط الناس
مش يقعد يلعب مع نفسه من غير إحساس
-8-
الحر عليه يسأل نفسه: حر مع مين؟ حر على مين؟
حُرّ؟ سارقها ورايح على فين؟
ما أنا برضه حر: بقينا اتنين !!!!
لو حر صحيح؟ بقى تستحمل حواليك أحرار
يعنى يختاروا ما دام أنت برضه بتختار
-9-
الحر الحر يلاقى دايمًا أحرار حواليه
ماذا وإلا:
يبقى فْ زنزانة الحرية وْمقفولة عليه
مشاركة
اضف تعليقاً واقرأ تعليقات القراء
مشاركة
