هاش تاج "حاجات بتحصل كل عيد" يرصد الاحتفالات المتكررة كل سنة.. التليفزيون يعرض "سك على بناتك" و"العيال كبرت" وبرضه بنضحك.. البنات: النظافة تحتاج لحامل أثقال.. والولاد: السهر طول الليل حتى الصلاة

بمناسبة عيد الأضحى المبارك، دشن نشطاء موقع التواصل الاجتماعى "تويتر" هاش تاج يحمل اسم "حاجات بتحصل كل عيد"، رصدوا من خلاله مجموعة الأفعال التى تتكرر كل عيد بشكل ساخر.

واجتمع النشطاء على مجموعة من الأشياء المتكررة فى كل عيد، مثل أننا "فى الأول نقاطع أفلام السبكى، وفى الآخر بيزود من أفلامه أكتر، وأفلامه تنجح وبتكون أعلى إيرادات".

والثانية، بجانب الكلمة الشهيرة للأهالى، "ده مش عيد عيدية ده عيد لحمة.. كلمة لازم نسمعها من الأهل كل سنة"، والثالث التليفزيون ينزل بمسرحيات "سك على بناتك"، "العيال كبرت" ،"المتزوجون"، "المشاغبين"، "كده أوكيه" وبرده بنضحك.

كما أكد الشباب أن أكثر ما يميز كل عيد هو سهرهم طوال الليل مع أصدقائهم، ثم يستمروا فى النوم من بعد الصلاة ويقضوا باقى العيد مرهقين.

وعلى النقيض، أكدت البنات أن أكتر ما يتكرر كل عيد هو نظام النظافة المتبع فى كل بيت مصرى قبل العيد اللى محتاج "حامل الأثقال"، وفى الآخر تفضل كل أيام العيد تعبان وجسمك مكسر منه وماتعرفش تعيد.

وأضاف أحد النشطاء قائلا، "أول يوم فى العيد هيسقط منك كل حاجة هتبدأ تانى يوم علشان دبكة اللحمة والأكل"، ورد آخر "أول ما تنزل الشارع تحس إنك فى عالم سمسم من كمية الأطفال"، وتابع آخر "بتحس إن نظرك قرب يروح أول ماتنزل الشارع من كمية الألوان الكتير اللى بتشوفها"، وأضاف آخر، "ده غير إن فى بعض البنات تلاقى لوحة فنية فى وشهم"، وغرد آخر، "التحرش ومعاكسات من أطفال بقت من طقوس العيد فى مصر"، وقال آخر "وأنت نازل من البيت تشم كل أنواع الأكل".