فى ذكرى تشى جيفارا، أهدى هذه القصيدة إلى روحه الخالدة
إنت من إيه اتعَمَلتْ ؟
ولاّ من مين اتولدتْ ؟
رغم أى عذر عندك
رغم إن الربو مرضك
للحقيقة صحيت وقمت
كنت غنى ومعاك كفايتك
مين يقول كان لَجل فقرك
للفقير ضحيت وعشت؟
لَجل هدفك ...سبت بلدك
سبت ناسك... سبت أهلك
فى البلاد طُفت و سافرت.
كنت دكتور راح يطيِّب
كل جرح ف قلب طيَّب
كل مِن قال اتظلمت
حتى لو مش بلدك أنت َ
أى ظلم ف أى حتة....
مش بدعوة ليها رحت .
كل مِن بالظلم حاكم
كل آثم كل غاشم
ضده كافحت ووقفت .
لمّا كنت يوم فى سلطة
قلت يلاّ بلاش أونطة
سبت مكاتبها وهجرت .
فى الجبال جوا الغابات
للبنادق والزناد
اشتهيت وأوام رجعت.
ضد ظالم .. ضد جانى
ده مكانى وده زمانى
دا الكلام اللى أنت قلت
وف مكانك وف زمانك
ونت لسه مجاش أوانك
وبشجاعة رحت مت.
هما فعلا ً أخدوا عمرك
لأ كمان ... دول خبّوا قبرك
بس رمز أنت فضلت.
مش مهم فين ومين
أى مذهب ... أى دين
إنت للإنسان حاربت.
للكرامة والعدالة
حتى لو فيه استحالة
بردو ما سكتش و ثُرت.
كل ثورى ييجى بعدك
يعشقك يحفظ حكايتك
للجميع أنت اتعرفت.
كلهم شافوا فى صورتك
والبيريه بيغطى شعرك
كل مبدأ بيه آمنت.
إنت ملهم للجميع
معنى مش ممكن يضيع
والغبى يقول أنت مت.
تشى جيفارا
مشاركة
اضف تعليقاً واقرأ تعليقات القراء
مشاركة
