"عكس النهار".. قصيدة لـسعيد حامد شحاتة

يا مصر أنا نفسى أسألك
................. مين فينا حرّ؟
من امتى حبك ع البدن
............ بقى شيء يضر؟
وإزاى حلاوتك فى اللسان
.................. بندوقها مرّ؟
... إيه فيكى يوجع أو يسرّ؟

يا مصر من فين نبتدى
................... ولفين نمرّ؟
وف أى مينا
.........هيرسى مولانا الأغرّ؟
................. مين فينا حرّ؟

مين فينا عارف سكّته
ومين فينا خوفك سكّته
ومين اللى ساكك سكّته
............. وواقف مُصِرّ
... إيه فيكى يوجع أو يسرّ؟

إيه فيكى ممكن يبقى نيل
................ أو سلسبيل
أو ع الطريق موهوب دليل
........ أو خيل بيرقص فى الممر
..................... مين فينا حرّ؟

مين اللى راسمك ع الخريطه
............. بطرحه وبيشمك يغر
................ والرسم دا خير واللا شر

يا مصر أنا نفسى أسألك
..................... أين المفر؟
...... إيه فيكى يوجع أو يسرّ؟
................. مين فينا حرّ؟
مين اللى ماشى بموكبك
................ عكس النهار؟
مين اللى واخد خطوتك
................... للخلف دُر؟