شعر ماهر مهران
أَخَد الصَّعيد نَفَسْ
وِعَبَّا نَغَاشيشه
وِسَنَد دِمَاغُه لْورا
واشْتَهىَ عِيْشُه
وبص ف خَيَال الْمَقَاتِة وضِحِك
اتْهيَّاله الْخَيال جِيشُه
ف شاور ببندقيته: صَفَا
راح الحُمار نَهَّق
صرخ وقال: أنت...
تاهت الْحُروف مِنُّه
طب اسْحَب الْحُروف يا صعيد
وِقُولْ انتباه من جديد
ضحك عليا البعيد
ورمى كلامى ورا ودانه
وفتح الصديرى
ف فرَّع الصبار من حضنه
وطَنَّشنى
وكَرَشْ فى الدِّماغ
وراح ساحب نفس تانى
وحَبَسُه فى سقف الرَّأس
وقال:
الوشوش دى مش وشوشنا
واللبن ما ينفعش يحرسه الأنداس
ياللى سرقتوا الرحمة من قلوبنا
عمر الوهم ما هايكون للغلابة خلاص!!
حتى لو اتخلطت الصُّور فى العيون
والعاقل بقى مجنون
والمجنون بقى الإمام
وشيخ العرب بقى جربوع
والجربوع داعى سلام
والْعُمَدْ ساحت هيبتهم تحت جزم العبيد
والعبيد لفُّوا على رأس الصَّعيد طُرَحْ
وحَطُّوا فوق الُّطُرَحْ بلاَّص
وأوهموه بأنهم دوا
وخلاص..
ف أكرُّش يا صعيد فى الرَّأس
وخدلَّك نفس تالت
اسحب
وخليك ثابت
اسحب
يمكن تشوف الدُّنيا مصهللة
بعد ما خابت
يمكن تشوف العسكرى
مش بيعرِّى الحريم
ولا بيدِّيك ع القفا
يمكن تشوف نفسك عايم فى النَّعيم
مش بتاكل الفصا
يمكن تشوف الميزان سليم
وتحس بدفا
لا مُيِّة تِهْرِى الكليتين
ولا كهربا تشوفها كل فين وفين
ولا ست غلبانة معاشها يضحِّك
كل يوم تصرخ:
يا كَفَرة أروح باليتامى دوله منكم فين؟!
ولا سماد بالكاوى
أسْحَب يا صعيد نفس قاوى
وأحكى للراوى
عن السم اللى ساكن ف التقاوى
عن دمنا اللى سال فى كل الدول
عن السم اللى ساكن ف التقاوى
عن وشوش نام فيها الحزن
عن قلوب تعبت من الشَّكوى
عن بلاد بعيدة
ومَنْسية..
عن ناس مش محسوب لها حسْبة
أحكى يا عمنا الراوى
عن بلاد بعيدة
ومنسية
عن ناس مش محسوب لها حسبة
غير فى الضرايب
والجهادية
وساعة ما الغزالة تصرخ بين سنان الغول
أسْحَب
وطقِّر على الرَّأس
وقول:
كان الصَّعيد ع يبقا نار
لو هوَّب ظالم مِنْيِّه
ليه دلوقتى رضى بالعار؟
وليه سلَّم رقبته
للى ع يلعب بيه؟!
وللى ها يسيبه للمواجع؟!
أسحب يا صعيد نَفَس سابع..
وأحبس
وأعطس
وِكُحْ
وِنِفْ
أسحب نفس جامد
يمكن الرُّوح تِشِفّ
وتشوف نَفْسَك
وأنت مِتْلَقِّح ع الطَّريق مقتول
لا جنة كما وعدوك
ولا حتى نار
مقتول ومحاصرك غول الانتظار
وحسرة من اللى كنت فاكره مُحِبْ..
ف أسْحَبْ
وشدِّ
وخلِّى بالك
العِمِّة بدأ فيها الحريق يشب
ياللى هَدِّيت جبال
وبنيت صروح للسَّما
فُوق
قبل ما يجى الشِّتا
وِتِتْهَد..
أو
ف أسْحَب يا صعيد نفس تامن!!
