فيسبوك
واتساب
عدت سنة واتنين
والثورة لسة بتستهجى
ح ـ رـ ى ـ ة
حـرية
تـتلخـبط ف حروف الكـلمة
تـنطقـها بالمقلوب
ولسانها العـاجز بـيتهـته
ع ـ د ـ ل
عــدل
تـنطقها بالمعـكـوس
وتحسـس ف الضلمة بإيدها
مرة تلوش
مرة تهوش
مرة تدوس على حد برئ
أو حد غريق
متعـلق بالقـشة بـيحلم برغيف العيش
مسـتـنى بكـرة بقاله سنين
ضـهره انحنى م الصبر
لا بكـرة قرب له
ولا صبره عايز ينـتهى
عـدت سنة واتـنين
والثـورة لسة بتسـتهجى
ك ـ ر ـ أ ـ م ـ ة
كــرامة
تـتبعتر منها حروف الكـلمة
ينـزف مداد القلم
يـبكى الميدان
تـنزل دموعه ف كف الأم الثـكـلى
تـتذكر الأوجاع وتـفاصيلها
لحـظـة سماعها الخبر
أول ما راحت مشرحة زينهم
اتـذكـرت آخر كـلام بـينهم
وطت على جـبـينه وباست
حست جبال فوق قلبها داست
حضنت تى شيرته الأبيض
أول مرة تـنادى عليه ما يردش
أول مرة بتحضن فيه
من غير ما تعاتبه على غيابه
أول مرة دموعها تبل جـبـينه
أخر مرة عـيونها تـشوفه
أخرمرة إديها بتلمـس شعره
عـدت سنة واتـنين
والثورة لسة بتستهجى
ط ـ رـ ى ـ ق
طــريق
والخـطوة تايهة
للشرق مرة
للغـرب مرة
وف كل مرة
لا مرسى تلقى
ولا شط يحضن
حاسـس سفينـتك يا وطن
مركـب ورق
عـدت سنة واتـنين
والثورة لسة بتستهجى
ك ـ أ ـ ف ـ ر
كـافر
تـندغـها شيوخ الفـتـنة لبانة
وتوزع صك النار والجنة
وينصب نـفسه إله
من دون الله
يزرع ف بلاد الأزهر فـتـنة
تـنام الناس على الفـتـنة
وتصحى الخلق ع الفـتـنة
من فوق المنبر يوم الجمعة
يدعى بحرقة
يارب شـتـت لليهود الشـمل
يارب يتم أطفالهم
يارب تخـزيهم
أخر النهار يدعى اليهود للعودة للمحروسة
عـدت سنة واتـنين
والثورة لسة بتستهجى
م ـ ص ـ ر
مصـر
صورة أرشيفية
