أنا الجندى فدا ترابك وحرس سهران على نيلك
وان غبتى عنى شوية من شوقى دوغرى اناديلك
عينى تسهر تدور عليكى وقلبى مسلم خادم عنيكى
مهما يحصلى يا غالية فيكى انا برضه عشمان وشارى
ياما عيونى يا غالية تدمع واخبى واخبى فحزنى وادارى
ولو زعلتى مرة منى يبقى كأن القمر متدارى
من يوم ما وعيت عالدنيا وانا رانن اسمك فودنى
بلاقينى رايق صفر وبإسمك بصوتى بغنى
باحلم بيوم ما اكبر وارد جميلك عليا
يا سمرا وبعقد لولى يزغلل عقلى وعنيا
ويومها كان حر شديد بس انا كنت متحمل
ياما قالوا فالتجنيد دا جمل ويستحمل
انا جندى شايل سلاحى سهران اعد النجوم واتأمل
فملكوت الخالق على ارض للذل والهوان ما تتحمل
فرحان والبسمة على وشى نفسى الليل يطول ولانامشى
اسهر مفنجل عنيا الواسعة واحرس تراب ارضك برمشى
ياما كنتى فبالى ولسه لحد ما اموت دايما عالبال
معرفش لحد امتى واللى يعرف دا يبقى محال
صوت القطر كان عالى وانا سارح وهايم فموالى
والعجل بيفرم القضبان بسرعة رايح لبر الامان
لكن القدر موصلنيش ومكانشى ليا عمر اعيش
بس كسبت برضه حبك يا غالية واغلى من عمرى
ياللى لما تيجى العتمة بلا قيكى فالعين شمسى وقمرى
حتى لو مش عارفانى انا عارف غلاوتك اد ايه عندى
وعشان تعرفينى هقولك اسمى انا ... انا الجندى
صورة أرشيفية
مشاركة
اضف تعليقاً واقرأ تعليقات القراء
مشاركة
