يا ام العيال:
وحياة أبوكى تخلّى بالك م العيال
وتسيبى روحى
تهيم فى جنّة مصر وتحوم ع الكنال
وتسيبى رجلى
تخطّى الممكن على حدود المحال
وتسيبى قلبى
يحطّ للتنهيده خمسين احتمال
وتسمّى لحظة ما انفرط
فارس من العقد الحلال
وان متّ غطينى بوطن
واسقينى م النيل الزّلال
وسيبينى اواجه بكره بهديّة بلال
واطلع لسور الجنّة واسألهم سؤال
يا معصّبين الحلم فى عيون السكك
تم اغتيال عصفور من الجنب الشمال
مين اللى هيشيل ذنب هذا الاغتيال؟
يا مبعترين الدم فى إدراج الدّكك
بركوا الجِمال ع الثورة واتقاموا الجِمال
ورجعنا نحلم بالوطن
ونعدّ أيام لاحتلال
يا أم العيال
وحياة أبوكى تخلّى بالك م العيال
وان متّ غطينى بوطن
واسقينى م النيل الزّلال
وسيبينى اقابل ربّنا ف إيدى العلم
وف عينى صورة مصر بضفيرتين وشال
