محمد وديع العلاوى يكتب: مصرى وأفتخر

لما أنسى إنى مصرى
أبقى مُت واخترت موتى
لما أحنى لعبد ضهرى
أبقى تهت عن سجودى
وأبقى مسلم بس اسماً
وأبقى مصرى بس رسماً
وابقى خايف يعلى صوتى
لما أمرمط اسمك بإيدى
لما أفرط فى روح وليدى
لما يبقى الحزن عيدى
أبقى مش إبنك يا بلدى
لما أنسى إنى ريفى
لما تحجب شمسى طيفى
لما أبكى لكلام عريفى
أبقى فعلا ناسيك يا بلدى
لما أنسى إنى مصرى
لما أنسى لحظه أصلى
لما أتوه وتتوه ملامحى
أبقى مش ابنك يا بلدى
عشت أفخر إنى مصرى
وإن يوم الثوره عمرى
وإن قلبى سلمته أمرى
لأجل حبك يا بلدى
لما أكدب عليك يا شعبى
أبقى قمت حفرت قبرى
لما أملا الوش غش
لما أبقى بألف وش
أبقى مش ابنك يا بلدى
لما أزَوَر يوم بطاقتى
واستخسر فيكى طاقتى
لما مره تروح لياقتى
ابقى مش ابنك يا بلدى
لما أبلع يوم لسانى
قبل ما أكمل كلامى
لما خوفى يرجعلى تانى
أبقى مش ابنك يا بلدى
الحقوا مصر البهيه
اللى ناسها ميه ميه
اللى نيلها وطينها ليا
منحه من ربك يا بلدى