فيسبوك
واتساب
رجعتى تحطى بينا سطور
رجــع يعلا مابينـا الســور
مافيش حــاجة بترضيكى
كـــأن القســـوة داء فيكى
قـــــوليلى إيــه يخليـــكى
تحسى بقلب مات مغدور
أنا اللى بكيت لأحـزانك
وانا اللى خنقنى دخـــانك
ولحظة م الوجـــع خـانك
داويتلك قلبـك المكســـور
أنا اللى نزلـت ف ينــــاير
وانا الـدم اللى كــان فــاير
بقيت دلـوقتى باتعــــــــاير
بفقرى وهـــدمتى الكستـور
أنا اللى وقفت ف ميـدانـك
وانا اللى سنـدت عمــدانك
وانا اللى حاصرت سجانك
ودمـى كشفــلك المســــتور
أنا اللى قطعتلك مشـــاوير
وانا اللى طالــبت بالتغيـير
ولما ســـألت ليــه التـأخير؟
قالـــولى لم يُصْبه الـــدور
انا اللى رمونى بالخـرطوش
وضــاع حقى وما أخــدتوش
زرعت الفـرح ماحصـدتوش
وغايب ذكـرى ف الدســـتور
أنا الموصــــوم بكلمة حــق
وانا المتهـــــوم بقــــــولة لأ
ولما بدأت اخــــاف وأقـــلق
قالولى دخلت ف المحظــور
أنا المعمى عشــان خاطـرك
وانا المـرمى قتيــل قطـــرك
ماجبتيش سيرتى ف دفاترك
ماقـولتيش سعيكــم مشكـــور
أنا الغــرقان ف عبـّـارتك
وشيلت الليلة ف خســـارتك
ياريتنى راهنت وخســـرتك
وكفنت الضمير بفتــــــــــور
أشرف الشافعى
