طمع العباد زاد
والعيب عيب العباد
والحق مسيره راجع
وكل شىء بمعاد
محفوظ حقى فيكِ
ولا عمرى خفت عليه
خوفى عليكِ إنتِ
يا حبيبتى يا بنت الإيه
من عيون حاسدين
للفساد عاشقين
ورغم الصلاة والصوم
نقصهم كتير فى الدين
لا عرفوا قيمة ترابك
ولا كم صحابى دق بابك
ولا كم صحابى مدفون فى أرضك
ولا كم دمعة وقت الفراق على أعتابك
ولا عرفوا غير الجنيه
والباشا وسعادة البيه
والكارثة إنهم عارفين
بعد الدنيا فيه إيه
فتشت كل القبور
ما شفت غير جثامين
ورايحة عفن ودود
بنهش فى بنى آدمين
لا شفت كفن ألوان
ولا سموكن ولا حرير
ولا شفت فيه خدم
يخدم رئيس وأمير
ومسكت حفنة تراب
معرفتش تراب مين
راجل ولا ست
غنى ولا فقير
كل إلِ عرفته إنى
محفوظ حقى فيكِ
قبر يستر جسمى
ومش كتير عليكِ
مهما النهب زاد
وضاعت كل حقوقى
لحظة خروج النفس
ها تسلمينى حقوقى
علم مصر
مشاركة
اضف تعليقاً واقرأ تعليقات القراء
مشاركة
