خبط القطر فى الأتوبيس
لازمتها إيه السبب مين
معقول على حبة كراريس
نخسر حكومة موحدين
****
وحد الله يا مسلم
وبلاش تزيد م الفتنة
دا مجرد أتوبيس وقطر
مش حريقة جوا بيتنا
****
أوع تصدق إلِ يقول
أطفال ماتت وأشلاء
الكلام ده مش معقول
ولو حقيقى يبقى ابتلاء
****
أوع تصدق إلِ يقول
شفت طفل ومن غير راس
لو أبوه يبقى فلول
وابن كلب كمان هلاس
****
شعبنا أصله عبيط وطيب
بيصدق إعلام دمرنا
بيعرض لينا صوابع روج
على إنها أشلاء أطفالنا
****
الحكومة دى ناس رجالة
أولهم دكتور قنديل
دمعة عينه يا عينى محالة
تقدر تمحيها المناديل
****
شفت دموعه وهو بيبكى
على أطفال أرض فلسطين
طب شوفت الجود وهو بيدي
ضحايا أسيوط تعويض ملايين
****
وكمان هيرجع المصاريف
إلِ اندفعت للكراريس
والخياط والخياطة
والمدرسة والأتوبيس
****
وإلِ مات له كوم أطفال
كان إهماله مش إهمالنا
ساب البيض كله فى سلة
ولا صدقش كلام أمثالنا
****
وممكن يبقى عقاب من ربه
على صوته إلِ إداه لحمدين
أسى وظالم جاحد قلبه
راح صوت لخلاف الدين
****
خبط القطر فى الأتوبيس
لازمتها إيه السبب مين
معقول على حبة كراريس
نخسر حكومة موحدين
صورة ارشيفية
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة