نهلة محمد عبد الحميد تكتب: إرادتك كفيلة بتغيير عالمك

لما تحس إن الأرض مثبتة رجليك ومش عارف تمشى خطوة لقدام مع إن رجليك سليمة وتقدر تمشى بس مش قادر
ولما تحس إنك مش قادر تكتب أو ترسم أو تعمل أى حاجة أنت كنت بتحبها زمان مع إن ايديك سليمة وانت شخص موهوب بس مش قادر.

ولما تحس إنك مش قادر تفهم ولا تفكر ولا تركز مع إن عندك وقت وعندك عقل ومنتاش مجنون وتقدر تعمل كل دا بس مش قادر.

وقت ما تعجّز أدوات ربنا خلقها فيك وقدرات مخلوق بيها إحساسك بإنك مش قادر بالرغم من عدم وجود أى علة تمنعك من القدرة هيعيشك طول عمرك مش قادر.

لا تسيب إحساس يعجزّك ولا تعترف بإحساس ممكن جدا يضيعك.. العمر قصير والحياة موجودة.. واعلم جيدا "بأنك إذا أردت فستفعل وإذا فعلت فستقوى وإذا قويت أتتك القدرة على فعل أى شى وكل شىء".. حلك فى إرادتك.. قاوم مغريات الحياة ومفاسدها بقوة، ولا تظلم نفسك بمفاتن الدنيا فإنها لا تستحق كل شر تجلبه إليها.. قدّر ذاتك وكن أنت الذى يستحق وجوده بداخلك..