راضى على الطهطاوى يكتب: الهجره غير الشرعية

محتار وعايز فرصة عمل = فاقد كل خطوط الأمــــــــل
ياما سمعت وعود وعهود = وحلم رسمته ضاع واختمل
**
محتاج مش لاقى إيد تتمد = وكل ما بفتح باب يتســـد
أسيب ترابك أنا يا بلادى = اتهان واتبهدل أمد اليــــد
وكل مابرجع أحلم تانــى= ألاقى طريق الحلم اتهــــد
***
متحطم من يأسى بعانـى = والكل ناسينى سلبى أنانى
معايا شهايد مش نفعانى = وابعت شكوى ماجانى الرد
**
نفسى ألاقى عمل فى حياتى = مش عايز أنا ملايين تتعـد
مش عايز أنا فيلا وعربيه =عايز لقمه يا دوب ع الكد
***
أنا محروم فعلا ًمن خيرك = بهاجر أشحت أنا من غيرك
دا انت يا بلدى نبع حنان = ليه ما بتدى حنان لطيرك؟
***
مقفول قدامى كل طريـــق = مش لاقى حتى شعاع لبريق
أفكر أهاجر أحسِّن وضعى =أروى عطشى أبل الريــق
دافع تمن السفر ديــــون = أرجع مترحل جثه غريـــق
***
أفكر أهاجر أروح اتهرب = حاسس انى عايش متغـرب
وكل مابحضن فيكى اتقرب = بتقسى الاقى الحب اتسرب
خدعونى قالواإيطاليا جنه = رحت مجازف أنا ومجـرب
****
مراكب مافيا والموج عالى = شفت الموت ونهبوا مالى
انت ياوطن الأمل الغالـــى = أنت ابويا وعمى وخالـــــى
ليه بتقسى عليَّا كتــــــير = عايز نظرة عطف لحالــــى
****
خلينى أعيش وياك متهنى = يا تقولى سفيرنا هناك مستنى
جوازى معايا باسمك أغنى = هجره سليمه بتخطيط فنى
أكسب رزقى أتمنى أرجعلك = وألاقى حلمى معاك اكتمل