حمدى يوسف يكتب: كان وأخواتها

عايش جوا بلادى ف خير
خيرها على دا أصبح عاده
أفطر فيها الصبح زعامه
بعد الضهر غدايا شهامه
أما ف ليلها ..عشايا رياده
مهما المعدة ف بطنى تكاكى
ولاّ مراتى تجيلها ولادة
ولاّ عيالى تطلب لقمه
أدفع كل فلوسى قياده
جدنا كــــان ...
خلّد اسمه واسم ولاده
واحنا لــســان...
جبنا حفيد سنّه صغير
اسمه ف عقل جيرانى حماده
هى زعامه ولاّ شهامه ولاّ رياده !
لجل حفيدنا بعد دا كله
... يبقى حماده؟
ولا العمله تبقى حمامه
نقصقص ريشها
لجل تعوم ويا حماده !
جوا جيوبى حبه ســياده
ف الأعياد أدفعهم عاده
وان كان شجب ولاّ إدانه
عيد الأضحى ف نص جمادي
لجل نضحى بربع شهامه
وحبه سلطه ونص رياده
ولا نزْكى بنص عيالنا
لجل جيران الست ريــاده
رغم الغمْ ..شايف
جوا عيون الخلق سعاده
تملا ضفاف النيل وزياده
بس سعاده ناقصه عباده
لجل الغاليه تشد الحيل
لازم شغلنا يصبح عاده
قلب ميدان الثوره مصانع
عايزه تروس مش طالبه بلاده
جوا عقول البعض تيوس
عايزه غسيل مش عايزه
..... إباده