رفعت يونان عزيز يكتب: رسالة طفل قبطى مسيحى لأخيه القبطى المسلم

"مينا رفعت يونان" طفل بالإعدادية متأثر بما يحدث نتيجة الفيلم المسىء لإخوتنا المسلمين، ما دفعه للتضامن مع أخيه "محمد صابر" زميله وصديقه منذ السنوات الأولى من الطفولة، وهما معًا مترابطان على أن يتصديا لأى تعصب وفتنة تفرق، وهما يبحثان معًا كيف يتجمعان من أجل الخير والأمان والسلام لهما ولأمثالهما وللشعوب التى يزعزعها الشيطان كاره المحبة والتسامح والسلام.

"من مينا؛ لمحمد.. مش هنتفرق عن بعضينا، أنا زعلان جدًّا من اللى أساؤوا لإخوتى المسلمين فى كل مكان همَّا مش عارفين، الله خلقنا كلنا أحرارًا وبيحبنا ويعطينا كل شىء ومبيفرقش فى عطاياه لينا، وكل واحد حر فى عبادته ودينه، أكيد اللى عملوا كده مفيش عقل فيهم يفكر للخير، فكرهم لما يثيروا فتنة بنشر فيلم يسىء للمسلمين شطارة بيها يقسموا مصر مسيحيين ومسلمين علشان يقدروا هم وشركاؤهم من الأعداء يسيطروا عليها ويحتلوها، وعلشان كده أقول لمحمد وكل إخوتى المسلمين مش هنتفرق عن بعضينا، اللى يسىء ليكم يسىء لينا، وأنا وأنت وكل المصريين الطيبين فاهمين، هنصد كيد المعتدى ونقف فى وجهه أياديكم فى أيادينا نطرد أى تعصب وضغينة تحاول تسيطر علينا إحنا لبعضينا وأنا وأنت وكل اللى زيينا هنبنى مصر الغالية علينا بالحب والتسامح والإخاء، نهدم فكر الحاقدين مهما كانت قوتهم ومكانتهم لأن فكرهم هو الشرير، قوم يا محمد نعلن للعالم إحنا قوة ومتماسكين مش هنتفكك ونسيجنا هيزيد قوة وهنكون متماسكين أكثر وأكثر من ذى قبل ودائمًا للخير والبناء والتعمير والمحبة لبعضينا على طول السنين".