محمد زكريا حبيشى يكتب: الحرام

بنستكتر على اخواتنا
يعيشوا عيشة مستورة
ووهْم الدُنيا يُسترنا
نبدّل أصل بالصورة
نحاول ندخل الجنة
نلاقى جنة مهجورة
ندارى جسمنا لكن
قُماش القلب يفضحنا
وجوانا الهوان ساكن
يبكّينا.. يفرّحنا
وأسرارنا بتتعبنا
مفيش مرة تريَّحنا
وليه أفكارنا تتعرى
وفاكرين انها الأصدق
ونتوضى ونتحرى
طريق الطاعة ونصدق
أتارى فِكْرنا كِدْبة
أتارى طبعنا الأسوأ
حقيقى الدنيا بنوتة
بتتمايل وتدلع
ولكن فيها ميت موتة
وهنسيبها وهنودع
بلاها الحيرة تشغلنا
وغيرة قلب بتولع
بنستحلى الحرام ولاَّ
حَنينا للحلال أكتر
وخوفنا مِ الإله ولى
ونتعافى ونستكبر
ومهما الدنيا تدينا
أكيد المولى فوق أكبر