محمد جاد الله يكتب: حدوتة اسمها الأمم "المتحدة"

اتصلت بى اليوم ابنة أحد معارفى، وهى طالبة ذكية فى المرحلة الإعدادية.
وقبل نهاية المكالمة، فاجأتنى متساءلة:
عمو... هو إيه حكاية الأمم المتحدة دول؟؟
قلت: إزاى يعنى إيه حكايتها؟..
فصمتت قليلا ثم قالت بصوت يملأه الحسرة: الناس اللى بتموت دى.. إزاى سايبنهم كده؟؟
٢٠٠ واحد يموت فى درعا، واللى اسمه بان كى مون ده، طالع يدين ويطالب وينادى؟؟؟ بس؟؟؟
قلت لها : بصى يا حبيبتى منظمة الأمم المتحدة دى عملتها الدول العظمى المنتصرة فى الحرب العالمية الثانية، علشان يجمعوا دول العالم كلهم فى منظمة كبيرة تحت سقف واحد..
علشان يحلوا المشاكل اللى ممكن تحصل فى المنازعات بينهم ويتفادوا الحروب..
بس طلعت منظمة معمولة علشان تكتف الضعيف للقوى، فما يعرفش يفلفص والقوى يوصل لأغراضه براحته..
وميزانية ومليارات ومقرات واجتماعات ومؤتمرات وخطب وعشرات الآلاف من الموظفين وكده..
وأهم حاجه إن كله بالقانون واللوائح..
قالت لى: يعنى إيه ده؟
فقلت: يعنى شغل درجات فى الطيارات والمراكب.. فيها دول درجة: أولى وتانيه وتالته وما تعديش..
والدول العظمى بتسوق العالم، ولو أى قرار هايطلع ممكن يهدد سياسة دولة عظمى تقوم مستخدمة حق الفيتو..
اللى هو اعتراض وتعطيل لقرار الأغلبية..
قالت أى: شغل فتوات يعنى..
قولت لها: تمام.. الله يفتح عليكى..
ولو بعض الدول العظمى لها مصلحة فى ضرب العراق واحتلاله وتقسيمه..
الأمم المتحدة تضمن غطاء الشرعية الدولية..
ولما يموت مئات الآلاف من المدنيين..المنظمة بتتأثر جداً..
زى ما شفتى بان كى مون كده..
لكن مرتبه ماشى تمام..
وعربيات وطيارات واستقبالات على كوكتيلات وتحيات وسلامات..
ولما الكيان الصهيونى يهود مدينة القدس المحتلة ويغير هويتها..
بيزعلوا زينا بالظبط وبيدينوا ويشجبوا..
بس ما بيعملوش حاجه..

ولما واحد طبيعى حر مش خاضع، ييجى فلته ويمسك منصب السكرتير العام، تقوم تجيله بقدرة قادر شوطه تاخده زى الخواجة داج همرشولد السويدى ابن الناس المحترم اللى وقف مع حق مصر أيام العدوان الثلاثى سنة ١٩٥٦، فتحطمت به الطائرة فى الكونغو سنة ١٩٦١، فى (ظروف غامضة)..
أو واحد زى الخواجة كورت فالدهيم النمساوى، وكانت مواقفه مع حقوق العرب إيجابية، وتجرأ وساهم فى إصدار القرار رقم ٣٣٧٩ سنة ١٩٧٥، اللى بيعرّف الصهيونية بأنها شكل من أشكال العنصرية والتمييز العرقى..
فطبعاً الكونجرس اليهودى العالمى حطه فى دماغه، والصهاينة المتطرفين لبسوه فى الحيطة وطلعوه صاحب تاريخ نازى عنصرى.
وده من منطلق إن اللى ييجى على إسرائيل ما يكسبش..
فده كله عادى يا قمر..
سياسة.. ومصالح..
ربنا يسهل يا حبيبتى..
العمل عمل ربنا..
قالت لى: بابا دايماً يقولى دايما الهمل عمل ربنا..
ونعم بالله.. بس النخوة والشجاعة والعدل يا عمو؟؟ أنت ما شفتش مسلسل عمر بن الخطاب؟؟
صمت وقد أحسست بارتفاع مفاجئ فى ضغط الدم، وبدأ العرق يتصبب من جبهتى..
وقبل أن أهم بالإجابة..
انقطع الاتصال..
فتنفست بعمق..
وقبل أن اتحرك من مكانى اتصل بى أباها وبادرنى قائلاً: يا أخى أنا مش عارف إيه جنس بان كى مون ده؟؟
فانفجرت فيه قائلاً: ده الشماعة اللى بابا اشتراها لنا علشان نسقط عليه عجزنا وقلة حيلتنا وضعفنا وهواننا..
يا مستنى السمن من النمل..
قول الحقيقة لبنتك يا أخى.. أنت خايف من إيه؟؟
فقال لى خايف يجيلها موضوع تعبير فى الامتحان وتكتب اللى فاهماه من بره المنهج
فتسقط..
..
آلو..
آلو..