غادة عطا تكتب: كلنا مصريون

كنتم قدام عينيا كلكم مصريين بالحب متجمعين كنت فرحانة بيكم وبقلوبكم على قلوب بعض، فى البرد حبكم بيدفيكم وبرغم القسوة والظلم الضحكة والأمل مليين عينيكم، كنت متأكدة إنكم منصورين لأنكم بالحب مدفيين.

فجأة فى يوم لقيتكم متقسمين إخوان وصوفيين وسلفيين، وكمان اشتراكيين ويساريين وليبراليين، فجأة لقيتكم أقباط ومسلمين فى قلوبكم من بعض شايلين، ولسنين العشرة وعهود المحبة ناسيين، فجأة لقيتكم مختلفين وعلى بعضكم قاسين، كلكم ضد بعض متحالفين كلكم بتكسروا فى بعض وعلى الفرقة ناويين، كل واحد عايز يكوش على كل حاجة ويتحكم فى كل المصريين، من نومى صحيت مفزوعة ولقيتنى بسأل مش دول كلهم كانوا ايد واحدة متجمعين ناسيين كل حاجة غير أنهم مصريون، هو مش إحنا كلنا مصريين نفس الهم ونفس الحزن ومعاناة السنين نفس الألم والمرارة والعذاب والأنين حتى إخواننا المسيحيين نفس الدم بيجرى فى شرايينهم زى كل المصريين، نفس التعب والخوف والأحلام والحنين ليه فجأة بقينا مختلفين وعلى بعضنا قاسيين وكلنا من بعض خايفين حتى دم الشهيد اللى سال على الأرض ما كانش همه إنه يموت فداء لكل المصريين عشان حلمه هيعيش جوه قلوب كل إخواته الباقين.

دلوقتى مش فاضل من الحلم غير الحزن من جديد وكسرة القلب والأنين ,على الأحلام الجميلة بعد شقاء كل السنين، القلب بيبكى لما بيشوف الحال اللى صار فيه كل المصريين لما بيشوف إخواته متقسمين بعد ما شافهم يد واحدة ضد الظلم متحدين وعلى الخلاص من المهانة والضياع والفساد متفقين والقلم بينزف على الورق من كثرة الحسرة والقهرة على اللى ضاع من عمر كل المصريين فى الصراع والكره لما ضاقت النفوس ونسى الكل أنهم لازم يفضلوا متوحدين، لو وصلتكم صرختى أرجوكم اوعوا تانى أشوفكم متفرقين ولحلمكم ناسيين ولحبكم لبعضكم ناكرين انتوا طول عمركم مصريين. أرجوكم تفتكروا إنكم عمركم ما هتحققوا حلم أى واحد منكم طول ما أنتم متفرقين، وعلى بعضكم قاسيين، عمركم ما هتنجحوا وانتم لحق بعضكم ناكرين و فى نوايا بعضكم متشككين ولكل واحد بينكم مخونين، وكل ذكرى حلوة ربطت بين قلوبكم متجاهلين وبكلمة أى واحد منكم مستهزئين، انتوا بتنجحوا بس لما بتكونوا ملمومين ومع بعض متفقين، ولبعضكم مقدرين، ولحق كل واحد ورأيه محترمين مهما كنتم معاه مختلفين ساعتها يد واحدة دايما باذن الله بتكونوا منصورين، ولحلمكم مقربين ومشواركم مكملين، أرجوكم اوعوا تنسوا حلمكم وترموا ثقتكم فى بعض ورا ظهركم، لو بعتوا حبكم لبعضكم إيه هيفضل يضمكم ويقربكم من بعضكم لو بعتوا حلمكم تبقوا بعتوا الغالى بالرخيص ورميتوا وراكم آمال ناس كثير عاشوا حلمكم ووقفوا بعمرهم جنبكم واتمنوا إن اللى جاى يكون لكم مع بعضكم مش بس لحد واحد منكم.