هشام فتحى يكتب: عريس رفح

جهزت كحك العيد
وبسكوت الفرح
ودفعت لك تمن الجهاز
فاضل يادوب فرش الفرح
أنا قلبى ملفوف النهاردة
من يومين باب القلق
ماله اتفتح
دانا نادرة أزور البيت
يوم ما أشوفك يا عريس
لابس يا واد بدلة فرح
واختك وفاء
بتجهز الفستان
ورقصتها على صوت القدح
زرعى إللى ضميته بحنان
وتعبت فيه
ودفنت فيه تعب السنين
بالحب غذيته وطرح
دلوقت لابس بدلته
صايم وماسك سبحته
تشهد عليه أرض العريش
تلة رفح
مش عارفة ليه
بعد الفطار
طليت على صورتك يا واد
قلبى انجرح
دقيت عليك
(مغلق)
وأنا قلبى انفطر
يمكن يا واد
اللحظة دى لحظة خطر
ما أنا قلت لك
ساعة الفطار
لازم تطمن قلبى وتهز الوتر
رنيت عليك
وأختك وفاء
مش عارفة ليه
بتضم ألبوم الصور
رن الجرس
وجريت على صوت الجرس
شيخ الخفر
والدمعة نازله من عنيه
وفهمت ليه
غاب القمر
جهزت ليه يا قلبي
بسكوت الفرح!!!
وإنت إللى موعود بالعذاب
جهزت ليه!!!!!
حددت ليه كتب الكتاب
جهزت ليه!!!!
متعوده الأحزان تاخدنى
من هنا
من باب لباب
فستان وفاء
معناته إيه
بعد إللى راح
زين الشباب