ماتوا ماتوا إيه الجديد؟
كلنا مأكول وميت
يوم ما مات حق اللى راحوا
فى الميدان
وفى بور سعيد
ماتوا ماتوا
إيه الجديد؟
كلنا واقفين نمصمص فى الشفايف
اللى فاهم واللى غافل
واللى قادر
واللى خايف
كلنا إيد واحدة فى الفرقة
وفى الصخب البليد
ماتوا ماتوا
إيه الجديد؟
ماتوا والفيس بوك صرخ
والرئيس ندد وصرح
والجرايد بكرة قالت
بعده عادت
قول نسينا
ويوم الجمعة
هنصلى على نبينا
وندعى لهم
وهنجيب المفيد:
ماتوا ماتوا
إيه الجديد؟
الشوارع
هى هي
الحوارى هى هى
الجوامع والكنايس
اللى فاضى واللى حايس
واللى عدى يجيب سحوره شاف صورهم
قال يا عينى
واللى كان ع القهوة
بيشيش وطالب فخفخينا
قاله شهل
قال له 5
العيال ماتوا فى سينا
والعجوز اللى فى سكاته
عاش حياته
قال له ماتوا
قال له مين يقدر علينا
قول كلام غير ده يا راجل
ده احنا بنفوت فى الحديد
واللى فايت قال يسلم
قالوا ماتوا
قال وماله
ماتوا ماتوا
إيه الجديد؟
لسه فاضل كام شهيد؟
