دعاء حمدان تكتب : العيب فى مين

الطير نوّح فى السما والعين بكت على حالك
خراب و صابك بالعمى لا كان فى يوم على بالك
باعوا رخيص اغلى الضنى والغدر منهم جالك
العيب فى مين يا بلد بالله عليكى فكى اللسان
بوحى و قوليلى مين مرمطك و مين اللى خان
واحد من شعبك الغلبان ولا واحد من الأخوان
ولا واحد من مليونية كل جمعه فى الميدان
ولا الكل اتفقوا على سكوتك ..على موتك
رافضين حتى يسمعوا صدى صوتك
كله عايز حقه فيكى و مين يجيب الحق ليكى
دى كفوفهم بدمك علمت على أراضيكى
تركة واتقسمت ..وشوش بزيف اتبسمت
ووشوش بصدق من حزنها أتالمت
فاكرين زمان كام راجل لبلده صان
سعد وعرابى وغيرهم كتير كمان
يشهد ترابك ان عمره عليهم ما هان
يشهد تاريخك ان دايما ليهم مكان
لسه فى قلوبنا بس الزمان غير الزمان
ساقيه و بتدور ولا بتثبت فى يوم على حال
اتبدلوا ولادك بالدور وانتى صابره صبر جمال
حالك يا بلدى يغم و لا كأنك كنتى ليهم أم
لا لقيتى فيهم خير و لا حتى ابن يضم
و الحق ضايع فيكى فى بير مالوش آخر
ده حتى الواد لأخوه مش راضى يتاخر
و ادينا اهو واقفين وسط الطريق تايهين
لا عرفنا احنا مين و لا حتى فين رايحين
بصرخ بعلو الصوت لو كنتو مش سامعين
كل اللى خانوا أمهم بريئة منهم ليوم الدين