سيد أحمد الهمشرى يكتب: كفايانا مستشارين !!

قولوا لمعالى الرئيس كفايانا مستشارين
اذا كنت عينتهم اللى هايدفع مين
لو كانوا فلحوا زمان كنا استشرناهـم
وكان زمان مصرنا زى اليابان والصيـن
......
الشهداء كانوا اولى منهم ياخدوا الف وســام
هما اللى ضحوا وكانوا فى الصفوف قــــدام
وقدموا دمهم لاجل الوطن ينهـــض
والله بالشكل دا حتى المقارنه حـــرام
......
شويه كل شهيد ياخد قلادة النيــــل
ضحى بدمه ماكنش فى حب مصر بخيـــــــل
و( احمد حراره ) اصول ياخد عشر نياشيــن
وهب لمصر عنيه وقال دا لسه قليــل
......
قولوا لمعالى الرئيس اخدوا الوسام على ايـه ؟
ومرتب المستشار عند الرئيس قد ايــه ؟
ومين هايدفع لهم مرتبات تانـى ؟!
واذا كنت قعدتهم اُمال عايزهم ليـه ؟
......
قولوا لمعالى الرئيس لسه الحساب مفتــــــــوح
والشعب بيقول كمان العفو مش مسمــــــــــوح
عايزين قصاص للولاد من رقبة الجانـــــــــــى
ويكون على المشنقه حتى طلوع الـــــــــــروح
......
قولوا لمعالى الرئيس الشعب فايض بيـــــــــــه
بعد نجاح ثورته مافيش وصايه عليـــــــــــــــه
ممنوع تجيب مستشار عاصر نظام فاشـــــــــل
يا تقول لنا حضرتك الدوله خربت ليــــــــــــــه ؟
......