راضى على الطهطاوى يكتب: جانا العيد

جانا العيد أهو جانا العيد = انسى الحزن وروح لبعيد
جاى بيجدد لينا الفرحــة = يخلِّى شموع الحب تقـــيد
اقلع كل شجر أحـــزانك = وازقى الحب ف كل قصيد
خليك زى الشمس تـنور = تنشر خير فى كل صعـيد
اصفح سامح كل النــاس = امسح دمع معاه تنهــــــيد
خليك زى الطفــل برئ = يرن الضحكة بصوت تغريد
الناس محتاجة منك ضحكة = مش محتاجة فلوس ورصيد
دا العيد جاى يمسح أحزانا = ويرقق قلب معانا حديــد
جدد ود لكل قرايبـــــــــك = جارك أوعى تسيبه وحيد
إياك تنسى زميل وصديق = أوطفل يتيم ف هم شريــد
طفل يتيم محتاج لحنان = مش بس الكسوة ولبس جديد
ومريض زوره خفف عنه = وردة فى إيدك أمله يزيــد
افتح كل بيبان للفرحــــة = رايح تلقى الحزن طريـــد
اقلع كل اللون الأســـود = خلى الأبيض رمز أكيـــد
شيل تكشيرة من على وشك = وارسم ضحكة بوش سعيد
افتح بيت الناس هتـــزورك = وابعت هنـِّى فى كل بريـد
جانا العيد أهو جانا العيد = انسى الحزن وروح لبعيد