فيسبوك
واتساب
تلاتين سنه
ولسه حبيبتى ناسيانى
وسايبانى وعايزانى
أعيش تانى
محروم ومتغرَّب
أرمى الحبال مابتشدى
أبنى الجسور وبتهدى
أجرى وراكى بتمدى
وعيونك عنى تتهرَّب
عاشق وليلى محرابك
وجلدى لونه بترابك
حروفى عايشه تغنيلك
والقلب شابك ف نخيلك
ودمى أصله من نيلك
ومتشرَّب
قضيت العمر بتحمل
وقلت الحمل يتكمل
بكره الصوره تتجمل
ألاقى الجرح ودموعه
أشوف الفرح وشموعه
بيبعد كل مايقرَّب
تلاتين سنه
ولسه الهجر جواكى؟!
وليه القسوه تملاكى؟!
ياروحى أنتى وملاكى
أعبِّى قلبى بهواكى
ألاقى الحب يتسرَّب
تلاتين سنه
ولسه حبيبتى ناسيانى
وسايبانى وعايزانى
أعيش تانى
محروم ومتغرَّب
صورة أرشيفية
