إيمان محمد البستانى تكتب: "أنا إخوانية ومحدش يقدر عليا"

زمان قبل الثورة كانت جماعة الإخوان تعرف بالجماعة المحظورة، وكل من كان ينتسب إلى جماعة الإخوان لا يستطيع أن يعلن بشكل واضح بأنه منها نظراً لأن النظام السابق، كان يعى بأنهم المنافس الأقوى لهم، ولكن بعد الثورة أصبح الإخوان هم من يحتلون الصدارة فى كل شىء ومن ثم رئيس مصر ينتمى إلى جماعة الإخوان فاختلف الحال.

فالغريب ما رأيته فى أحد المحلات عندما وجدت امرأة تكلم البائع، وتقول له خد بالك أنا إخوانية ومحدش يقدر عليا، فهنا تذكرت بأن هذه الكلمة قالتها من قبل نادية الجندى فى أحد أفلامها ولكن لأن ذاكرتى لم تسعفنى باسم الفيلم نظراً لأنى شاهدته فى طفولتى، ولكن تذكرت جملتها عندما كانت تقول "أنا براوية ومحدش يقدر عليا" ولكن للأسف فى نهاية الفيلم ماتت.

وبالتالى لا يمكن لأحد أن يعلن أنه لا أحد يقدر عليه وأبسط دليل النظام القديم ولكن باختلاف التشبيه الذى ذكرته فى الفيلم ولكن لا أعرف لماذا جاء هذا المشهد فى ذاكرتى ولكنى تذكرته ولكن الشىء الظريف بأننى وجدت البائع يرد مسرعاً ويقول وأنا فلول ومحدش هيقدر يحاسبنى ففى بداية الأمر ظننت بأن هذا الموضوع فى إطار كوميدى ولكن فجأة بعد ما قال ولا أحد يقدر يحاسبنى اشتد غضب هذه السيدة، وأصبحت تقول لا هنحاسب وهتشوف "إحنا مش زى إللى طبب" فرد البائع مسرعاً يا حاجة أنا مش قصدى أنا بس كنت بسخر من الفلول، وأصبح يمدح مرسى وهنا هدأت السيدة وقالتلوا "أيوة كده "ومشت.

وللصراحة نظراً لكونى شغلتى صحفية فحب الفضول دائماً يغلب عليا، فبدلا ما أمشى من المحل إللى أنا واقفة فى ومش لاقية حاجة أصلاً اشتريها استمررت فى الوقوف لأرى ماذا سيقول البائع بعد مشت هذه السيدة الإخوانية فوجدته يقول "أنا ولا إخوانى ولا حاجة بس خفت ما الواحد مبقاش عارف كنا زمان نخاف منهم لأن النظام القديم بيقولوا عليهم إرهاب والواحد دلو قتى خايف منهم عشان هما إللى فى إيديهم الحكم الواحد محتار".

فهنا كان على أن أتكلم قلت هو إحنا لازم نخاف وخلاص قول رأيك وشوف على الأقل تعرف الكلام إللى كان يقال عنهم من قبل النظام القديم كان مجرد كلام، وليس له صلة بالحقيقة، ولا إيه قالى، وأنا مالى، قلت مالك ناس ماتت، واستشهدت عشان ننسى الكلمة دى ونفتكر بأننا نعيش فى وطن ليس ملكا لأحد بل ملك الجميع وهنا وجدت أمى تنادينى، وتقول لى أنتِ مالك كل واحد حر هو إحنا نغير الناس، وكمان خلى بالك يكون فى حد بيسمعك قلتلها إيه اوع تقولى أنهم لسه؟ قالت والله ما أعرف يا بنتى بس أنا عايزة أروح بيكِ وعشان هى أمى وممكن تزعل منى التزمت الصمت وقلت للبائع سلام، ويا ريت تحاول تعمل بالكلام.