سيد أحمد الهمشرى يكتب: خايف!

خايف صيامى يضيع وانا دمى متعكـــــــــــــــر
خايف كمان من لسانى ينطق المنكــــــــــــــــــر
وانا كان لسانى عفيف وقلبى كان ابيــــــــــــض
وكان كلامى جميل احلى من السكــــــــــــــــــر
...
خايف اطيح فى الحكومه بكلمتين فارغيــــــــــن
اللى مفيش عندها ولا جاز ولا بنزيـــــــــــــــــن
مش لاقى حاجه اولع بيها فى هدومــــــــــــــــى
ولا عارف اشكى وافضفض من همومى لمين ؟
...
مركب وليها ريسين قالوا لازم تغــــــــــــــــرق
واللى بيظلط كتير لازم فى يوم يشـــــــــــــــرق
ياما نفسى اقطع ايدين اللى اخد حقـــــــــــــــــى
وبقاله تلاتين سنه بيضل وبيســــــــــــــــــــــرق
...
حتى معالى الرئيس بقاله تلاتين يــــــــــــــــــوم
وانا فى انتظار حضرته مبدقش طعم النــــــــوم
خايف قطار الرخاء يعدى ملحقهــــــــــــــــــوش
وانا بقالى كام سنه من الرخاء محـــــــــــــــروم
امانه اللى يشوف (طنطاوى) او (مرســـــــــى)
او حد من عندهم قاعد على الكرســـــــــــــــــى
يبلغه ان انا فاضل يومين وهمـــــــــــــــــــــوت
ويبقوا يقروا عليه (اية الكرســــــــــــــــــــــــى)