هشام فتحى يكتب: بنكتب ليه؟

ساكن ف نفس الدور
قلبى اللى بات محروق
خايف من اللى تحت
قلقان من اللى فوق
لو نمت يوم ع الجنب
اصحى وانام مخنوق
ولا يوم حكيت مع حد
فى الررزق والمرزوق
ما صعبت يوم على حد
ولا حد خدنى لفوق
دنيا وهموم الخلق
دلوقت ماليه السوق
جرى إيه يا كلمة حق
طعمك مرار بندوق
لا رسينا يوم على بر
يا حلمنا المشنوق
هوّ اللى عاش ف الغُلب
يسكن بلاد الشوق!!
..... ...... ....
نبيع الحلم
نزرع ورد
يملى الشوك أراضينا
ونجنى الخوف
وياما الخوف بيشقينا
أنا ملّيت
كتبت الشعر غنيته
بنيت الحلم من بيته
عرفت الحزن يوم جيته
حروف الشعر تكوينا
أنا غنّيت
وطال ف الحزن موالي
على حرفين
واحد منهم يسليني
وحرف يقطع اوصالي
ويحلى الدمع ف عنينا
أنا ضحّيت
سهرت الليل
وأنا وحدى بعدى بحور
كتبتلها ملاك الحور
حروف تشهد عليها سطور
وياما الموجه بيّا تدور
تريت الدنيا مش لينا
وغنينا
سهرنا كتير وعدينا
وغاب الفرْح يوم جينا

بنهرب ليه؟!!
ادى الدنيا وادى حالها
بنكتب ليه ؟!!
وكل قصيدة باحوالها
ونسهر ليه؟!!!
ما دام الليل يسهرنا
ويجى النور يموت فينا