إيمان محمد البستانى تكتب: هو سؤال؟؟

أنت حبيبى وأنتى حبيبتى كلمة بجد كتير تتقال بسمع عنها فى كل مكان، من شاب مراهق لحد كبير بس بجد هو سؤال ؟؟ هى من القلب بتتقال ولا مجرد كلمة وسلام...
يعنى مجاملة ولاخلاص عشان اتقالت لازم الطرف التانى يقولها قوام
أصل أنا شايفة إن الحب أكبر من الكلمة بتتقال
وانتى يا اختى يااللى اسمك حواليه بسرعة تردى قوام خلى حياءك كده قدامك
حتى إن كان فى قلبك بركان خلى مشاعرك كده جواكى
وسيبك أنتى من أى كلام واوعى تنسى كلامى قوام
وإن كان بيحبك هيسمع قلبك مش محتاج أى كلام
وأنت ياخويا يلا تملى تقول يا حبيبى اوعى تكون بتلعب بيها وافتكر إن الدنيا هترد قوام إما فى أختك ولا حتى يكون فى بنتك كمان،، بس بجد أنا بتكلم مش عايزاك تجرح فيها ومتنساش إنها إنسان
ولا موضة التانية كمان
لما ألاقى الست الحلوة تنادى على جوزها وتقولوا يا بابا،، يجى الزوج يرد قاوام أيوة يا ماما أنا هنا يا مدام
والله عجيبة لما الزوج يبقى يا بابا طب من حق هو باباكى هيطلع مين
مش عارفة صحيح أنا ليه بتدخل بس بجد هو سؤال
هى حبيبى ولا حبيتى كلمة من القلب بتتقال ولادا كله كلام فى كلام
أيوة أنا عارفة إن كلامى دا مش وقته،، بس تعبت من السياسة كل ما أكتب فيها ألاقى الناس بسرعة تقول،، أصل دى باين كده دى فلول ولا بجد دى إخوان....
يعنى بجد كده احترت هو أنا لازم أبقى لحد أنا مصرية وحرة فى رأيى
وأنا مليش بقى دعوة بحد وخلاص قررت إن كفاية كلام فى السياسة وتعال نتكلم فى الحب.